رغم إحساسى بالألم وأنا باكتب التدوينة دى ... بس لازم نقف ونبص حوالينا ونشوف إحنا رايحين فين ومصر رايحه فين ؟؟
وهنقدر ناخد بإيديها بوقفتنا فى الميدان دلوقتى ؟؟
ولا المسافة مابينا وبينها حتزيد وتفضل تزيد لحد مانتعود نبعد عنها ونفرح فيها الأعادى ؟؟
إخوانى أشرف شرفاء هذا الوطن إخوانى أبطال جيل 25 يناير أسود التحرير وشارع محمد محمود
تعالوا مانسودهاش قوى ونشوف شعاع الأمل إللى طالل قدامنا من خرم الباب القديم أبو قفل مصدى
تعالوا نشارك فى التجربة بكل عيوبها ونداويها عيب عيب لحد ما ينصلح حالها
تعالوا نبنى لنفسنا أرضية صلبة فى شوارع مصر إللى الجهل والعصبية محتلينها من سنيين طويلة
أنا عاذر أخويا وصاحبى وزميلى فى الشغل إللى مصدق إننا ماعندناش حق فى إعتصامنا ومطالبنا بإن الثورة تكمل للنهاية
عاذرهم لأنهم تعبوا كتير من إعلام مضلل لشيخ جاهل لسياسى مستغل لمجلس متواطىء وداخلية قذرة وبلطجية طيروا النوم من عينيهم
أعذرونى المسافة مابينا وبين الشعب بتكبر كل يوم بنقضيه فى الميدان
وأعدائنا عارفين إزاى يمرحوا فيها ويزودوها أكتر وأكتر علشان يخدموا مصالحهم وبالمرة يكسرونا ويرتاحوا مننا
لازم ننظم صفوفنا و ناخد نفسنا ونبدأ ننتبه
مزيد من الإبتعاد عن الشارع لا يعنى سوى شيء واحد .....
موت ثورة 25 يناير وإختصارها فى وصول تيار معين للحكم
مش حنتنازل عن شيء ولا حنتهاون فى حق إللى ضحوا بأرواحهم وأغلى ماعندهم
هنكمل ثورتنا فى كل بيت وكل شارع وكل مدرسة وجامعة وميدان
رغم كل شيء ثورتنا نجحت وبتنجح وهتنجح بشرط مانيأسش ولا نستعجل ولا نفقد الأمل فى مصر
أرجوكم تعالوا نصلى على أرواح شهدائنا وننظف الميدان ثم نغادر لنصنع فى مصر بأفكارنا النقية مليون ميدان
